പ്രഫ. വിനോദ് പ്രസാദ് സിംഹ് (1940 ജൂണ് 10 - 2013 ഫെബ്രു 8) ഛായ: എബി ജോണ് വന്നിലം |
പട്ന: സമാജവാദി ജനപരിഷത്ത് മുന് പ്രസിഡന്റ് വിനോദ് പ്രസാദ് സിംഹ് ഫെബ്രു 8 വെള്ളിയാഴ്ച അന്തരിച്ചു. കുറച്ചുകാലമായി കിടപ്പിലായിരുന്ന അദ്ദേഹം രാത്രി 9.45നു് എ ഐ ജി എം എസില് വച്ച് അന്ത്യശ്വാസം വലിച്ചു. 73 വയസ്സുണ്ടായിരുന്നു. ഭാര്യയും അളക റാനി സിംഹ്, രേഖ ബബ്വല് എന്നീ രണ്ടു് പെണ്മക്കളുമുണ്ടു്.
1940 ജൂണ് 10നു് ബിഹാറിലെ മുസാഫര്പുര് ജില്ലയിലെ രാമനഗര് ബാഘാഖാല് എന്നസ്ഥലത്തു് മഹേശ്വര് പ്രസാദിന്റെ മകനായി ജനിച്ചു. ദില്ലി യൂണിവേഴ്സിറ്റിയിലെ ഒരു സാമ്പത്തിക ശാസ്ത്രപ്രഫസറും പിന്നീടു് സത്യവതി കോളജില് പ്രിന്സിപ്പാളുമായ അദ്ദേഹം പിന്നീടു് ജോലി രാജിവച്ചു.
12ആമത്തെ വയസ്സില് സോഷ്യലിസ്റ്റ് പ്രസ്ഥാനവുമായി ബന്ധപ്പെട്ടു.1971ല് സമാജവാദി യുവജനസഭയുടെ ഖജാന്ജിയായി.1973-77 കാലത്ത് സോഷ്യലിസ്റ്റ് പാര്ട്ടിയുടെ ദേശീയ സെക്രട്ടറിയായിരുന്നു. ജനതാപാര്ട്ടി രൂപം കൊണ്ടപ്പോള് അതിന്റെ ബിഹാര് യൂണീറ്റ് സെക്രട്ടറിയായി.1977ല് ബിഹാറിലെ മുസാഫര്പുര് ജില്ലയിലെ ഗായഘാട് നിയമസഭാമണ്ഡലത്തില്നിന്നു് ജനതാ പാര്ട്ടി ടിക്കറ്റില് നിയമസഭാംഗമായി. സ്വതന്ത്രനായ ജിതേന്ദ്ര പ്രസാദ സിംഹനെ 55%സമ്മതിദാനം നേടിയാണു് പരാജയപ്പെടുത്തിയതു്.1977മുതല് 80വരെ ബിഹാറിലെ നിയമസഭാംഗമായിരുന്നു.
1980 മുതല് 82 വരെ ലോകദളിന്റ സെക്രട്ടറിയായി. 1995-ല് സമജവാദി ജനപരിഷത്തിന്റെ സ്ഥാപകനേതാക്കളിലൊരാളായി. സമാജവാദി ജനപരിഷത്തിന്റെ ദേശീയ ജനറല് സെക്രട്ടറിയായും (1999-2003) രണ്ടു് പ്രാവശ്യം ദേശീയ പ്രസിഡന്റായും (2003- 2007) പ്രവര്ത്തിച്ചു.
അരഡസന് പുസ്തകങ്ങളുടെ കര്ത്താവായ അദ്ദേഹം പ്രശസ്തമായ പ്രതിപക്ഷ് പത്രികയുടെ പത്രാധിപരായിരുന്നു.
സോഷ്യലിസ്റ്റ് വിക്കിയില് ഇത് ലേഖനമായിരിയ്ക്കുന്നു.